一位婆婆推門快步走進門診，緊隨其後的應該是她的女兒。
這是早上的老人記憶科門診。望望牌板，面前的婆婆已經89歲了! 想不到她走路如此穩當。她年多前被發現記性漸差，故此被轉介到記憶科門診跟進。
「點呀婆婆？啲記性點樣？」我笑着對婆婆說。
「記性？。。。無乜嘢呀我啲記性，係唔係呀？」婆婆很自然地把頭轉向女兒問道。
很多老友記當要答別人問題的時候，都會想依賴子女。
「咁仲有無打麻雀呀？」根據記錄，婆婆閒時最愛打麻雀。
「有呀佢，又自己打 iPad 啲麻雀 game，又有同我地打，一日夾埋打成幾個鐘呀。」女兒說。
「你好鐘意打麻雀㗎？」我追問。
「係呀，我成日打㗎，用多啲個腦嘛。」婆婆大笑着。
「係呀，我覺得打麻雀幫到佢好多。」女兒補充說。
日常有足夠的活動刺激大腦運作，對認知障礙症的老友記當然是最好!打麻雀既能鍛練認知，老友記又喜歡，當然是一個好選擇。
「我仲日日自己去游水㗎!」婆婆顯得雀躍，說得興起突然除下口罩。。。
「你睇我邊似 89歲？哈哈!」婆婆似乎很高興很滿足。
「仲有呀，我每日都按摩個頭100吓㗎，對個腦好。。。」婆婆把雙手放在頭皮上示範給我看。
每天自己去游水，又打幾個鐘麻雀，更為自己定時按摩頭皮希望促進血液循環。。。婆婆的生活日常也夠豐富了吧! 既有運動鍛練身體，又有麻雀玩樂維持認知，難怪婆婆狀態這麼好!
這不就是我們經常提倡的 Active Ageing 積極老年？與其自怨自艾，終日想着自己逐漸年華老去，日子將盡，何不善用時間，在自己能力許可下盡量活得精采？
問過症，又檢查過，婆婆和女兒也準備離開了。
「醫生，你睇我係唔係好叻呢？哈哈!」婆婆哈哈大笑起來。
「何止叻!，直頭勁添啦!」我也笑着回應。
婆婆似乎真的很滿意現狀，有着一份發自內心的喜悅。但願各位老友記都能找到自己的快樂，擁有豐盛而滿足的晚年生活。
Search